حكاية حكاها جدى من كلماتى

شايفك حلم تايه مسنود على حيطة مايلة
شايفك ايام طفولة جدى اللى اتسنت مع الايام
شايفك عيون فرحانة ودموعها سايلة
شايفك وشوش مرسوم عليها اليأس مـ الاحلام
******************
شايفك ابرة ضايعة وسط كوم قش
شايفك بحر مفيش ولا نقطة مية فيه
شايفك طير مهاجر نفسه يرتاح فـ عش
شايفك نهاية طريق الناس خايفة تمشيه
******************
شايفك مرايا بتعكس كل حاجة تشوفها
شايفك كتاب عشان يكمل فاضله يادوب شوية سطور
شايفك قضية فى محكمة القاضى غاوى ياجلها
شايفك ضلمة عمرها ماشافت شعاع النور
******************
شايفك شهادة زور شهدها عمدة بلدنا
شايفك خيط عنكبوت متعلق بقشاية
شايفك قطر عطل بينا قبل ما نوصل محطتنا
شايفك نهاية ايجت من قبل البداية
******************
شايفك زحمة تااااه فيها الصغير والكبير
شايفك عيون مفتحة بس مش قادرة تشوف
شايفك طير جناحه عجز وعمره ما فكر بيه يطير
شايفك قلب جرىء اتملى بالخوف
******************
شايفك طفل راسم رسمة مش فاهمها حد غيره
بس فاكر ان كل الدنيا فهماها معاه
شايفك كلام ملخبط محدش قادر يفهم حروفه
شايفك ام ابنها متغرب بقاله سنين ومستنية لحظة لؤاه
******************
شايفك ابن كان ماسك فـ ايد ابوه وتاااااه منه
شايفك حكاية حكاها جدى من مية سنة ونسيناها
شايفك كلام ايجى لمجروح على جرحه
شايفك حدوته ملتوته زهقنا منها من كتر ما سمعناها
******************
شايفك مركب بطوح فيها موج عالى شمال ويمين
شايفك رغيف حاف بحلم بيه جعان
شايفك كلمة وداع اتقالت بعد عشرة سنين
شايفك خطوة رايحة جاية مش ثابته فى مكان
*******************
شايفك جلبية فلاح دابت من كتر الشقى
شايفك بيت فقير أيل للسقوط
شايفك عيلة كل ليله تنام من غير عشى
شايفك ناس مظلومة نفسها تفرض شروط
******************
شايفك موضوع بسيط طارت فيه رقاب
شايفك حبل مشنقة ملفوف على رقبة برىء
شايفك شباب صاحبه معرفش قيمته الا بعد ما شاب
شايفك شوك مرمى وسط الطريق
******************
شايفك سجن عمر ماتسجن فيه غير المظلوم
شايفك سيف غرقان بدم السياف
شايفك مقدمات موضوع ملهش اى لزوم
شايفك حاجة كل اما اشوفها بخاف
*******************

رائع يااحمد

ربنا يوفقك

والى الامام

تحياتى

اشكرك كثيرا ياستاذ وحيد واتمنى ان

اراك دائما متبابعا لاعمالى المتواضعة

دمت بخير

مع الاحترام والتقدير

» من كلماتى .........................كل بيت .............اتمنى تعجبكم.